Земјотрес со јачина од 4 степени според Рихтеровата скала е регистриран утрово во 9.16 часот во Грција, на Санторини.
Епицентарот на земјотресот, според податоците на Европско-медитеранскиот сеизмолошки центар, се наоѓал на длабочина од приближно 10 километри под површината на земјата.
Засега нема извештаи за материјална штета или повредени, а надлежните служби ја следат состојбата.
Претходно, земјотрес со јачина од 3,4 степени беше регистриран во 8.33 часот. а две минути пред тоа земјотрес со јачина од 3 степени. Истата магнитуда на земјотресот е забележана и во 7.54 часот. И нешто по 19 часот земјотрес со јачина од 3,4 степени.
Од полноќ на Санторини се регистрирани повеќе од 20 земјотреси.
Вонредна состојба е прогласена на грчкиот остров Санторини по серијата силни земјотреси кои со денови го потресуваат, принудувајќи илјадници луѓе да се евакуираат.
Најсилниот земјотрес, со јачина од 5,2 степени според Рихтеровата скала, го погоди островот во средата вечерта, а се случи на длабочина од пет километри, по напливот на сеизмичката активност.
Илјадници луѓе го напуштија Санторини и околните острови во Егејското Море поради страв дека допрва треба да дојде уште еден – многу поинтензивен – земјотрес, кој може да доведе до цунами или дури и вулканска ерупција.
Грчките власти претходно прогласија вонредна состојба до 1 март.
„Со одлука на Генералниот секретаријат за цивилна заштита, општина Тира прогласува вонредна состојба, со цел да се одговори на вонредните потреби и да се справат со последиците од сеизмичката активност што неодамна се случи во споменатото подрачје. Оваа одредба ќе важи до 1 март“, се наведува во соопштението.
