Се бара правото на слободно истражување на космосот

Граѓанската космичка агенција на Македонија поднесе иницијатива до Претседателот, до Собранието и до Министерството за надворешни работи, со која бара државата да изврши ратификација на меѓународните договори од областа на космичкото право, соопшти здружението.

Со иницијативата се бара и да се утврди официјалната македонска космичка политика.

„Со вселенската иницијативата бараме членство во Комитетот на Обединетите Нации за мирољубива употреба на космосот и во Европската космичка агенција. Бараме да се усвои Македонски космички законик, со кој ќе се кодифицира релевантното законодавство и ќе се основа Македонска агенција за космосот (МАК), како и признавање, почитување и примена на Македонската космичка декларација од 2 мај 2024 година“, соопшти Граѓанската космичка агенција на Македонија.

- Advertisement -

И ние, македонските граѓани, имаме слобода за истражување на вселената и право на еднаков пристап до благодатите од нејзината употреба, се вело во соопштението.

„Време е државата достоинствено да ги признае, почитува, применува, гарантира и да ги заштитува овие права“, се додава во соопштението.

Граѓанската космичка агенција на Македонија се основа минатата недела на Природно-математичкиот факултет при Универзитетот „Св. Кирил и Методиј“ во Скопје на заедничка свечена седница на Меѓународниот комитет на космичкото движење и на Македонското космичко друштво Битола. Како што соопштија тогаш, целта е да се создаде нов, граѓански и научен пристап во вселенските активности на Македонија. Агенцијата е прва од ваков вид и е чекор кон граѓанско-научно вклучување во мирољубивото истражување и употреба на вселената.

Во македонското космичко друштво се обединети граѓански организации кои се активни во вселенските
активности, и тоа: Македонското астрономско друштво, Скопското астрономско друштво, Македонското истражувачко друштво, Македонски студенти за истраување и развој од космосот и Здружението за вселенски развој. Претседател на друштвото е проф. д-р Ивица Милевски.