САД ќе воведат царина од 104 отсто за кинеска стока од среда, 00:01 часот по источна американска временска зона (вечерва, 21:01 часот по македонско време)

САД ќе воведат царина од 104 отсто за кинеска стока од среда, 00:01 часот по источна американска временска зона (вечерва, 21:01 часот по македонско време), потврди официјален претставник на Белата куќа, јавуваат западни медиуми.

Оваа одлука следи откако Пекинг не ги укина своите контрамерки кон американските производи до утврдениот рок – вторник напладне, како што претходно побара американскиот претседател Доналд Трамп.

Наместо тоа, Кина соопшти дека „ќе се бори до крај“ и ќе преземе противмерки против САД за да ги заштити своите интереси, откако претседателот Трамп се закани со дополнителна царина од 50 отсто на кинескиот увоз.

- Advertisement -

Министерството за трговија во Пекинг соопшти дека наметнувањето на таканаречените „реципрочни царини“ од страна на САД врз Кина е „целосно неосновано и претставува типична еднострана практика на застрашување“.

Кина, втората по големина економија во светот, најави одмазнички царини, а Министерството во својата последна изјава навести дека може да следуваат уште мерки.

„Противмерките што ги презема Кина имаат за цел да го заштитат нејзиниот суверенитет, безбедност и развојни интереси, како и да го одржат нормалниот меѓународен трговски поредок. Тие се целосно легитимни“, соопшти Министерството.