САД денеска извршија нови воздушни напади врз Јемен

САД денеска извршија нови воздушни напади врз Јемен, објави телевизијата на Хутите, Ал Масира, со што се прошири најголемата американска воена операција на Блискиот Исток откако претседателот на САД, Доналд Трамп, ја презеде функцијата во јануари.

Одговарајќи на заканите од движењето Хути за меѓународниот бродски превоз, САД завчера започнаа нов бран воздушни напади врз групата, поддржана од Иран.

Телевизијата објави дека денеска, во понеделникот, цели биле пристанишниот град Худајда на Црвеното Море и провинцијата Ал Џауф, северно од главниот град Сана.

- Advertisement -

Најмалку 53 лица загинаа во нападите, изјави вчера Анис Алсбахи, портпарол на Министерството за здравство со кое раководат Хутите.

„Во нападите загинаа 5 деца и 2 жени, а ранети се 98 лица“, напиша Алсбахи на социјалната мрежа Икс.

Хутите, вооружено движење кое презеде контрола над поголемиот дел од Јемен во текот на изминатата деценија, извршија десетици напади врз бродови во близина на јеменскиот брег од ноември 2023 година, во знак на солидарност со народот на Газа поради израелските копнени и воздушни напади.