Рускиот енергетски гигант „Лукоил“ соопшти дека планира да го продаде својот имот во странство по санкциите за нафта што ги воведе американскиот претседател Доналд Трамп минатата недела.
Во соопштение на својата веб-страница, „Лукоил“ вели дека започнал потрага по купувачи за своите странски инвестиции, објаснувајќи дека одлуката е донесена „поради воведувањето рестриктивни мерки против компанијата и нејзините подружници од страна на некои земји“.
„Разгледувањето на понудите на потенцијалните купувачи започна“, додаде компанијата.
Продажбата на имотот се спроведува според лиценца на Канцеларијата за контрола на странскиот имот OFAC за ликвидација, соопшти седиштето на компанијата во Москва.
Доколку е потребно, Лукоил планира да аплицира за продолжување на лиценцата за да обезбеди континуирано работење на своите меѓународни имоти.
Поранешен директор на компанијата кој сакаше да биде анонимен, за Политико изјави дека продажбата би можела да ги намали приходите и профитот на компанијата за 30%.
Дополнително, „Лукоил“ ќе биде принуден да продаде 3 рафинерии, како и половина од своите 5.000 бензински пумпи низ целиот свет.
Заедно, Роснефт и Лукоил преработуваат приближно две третини од 4,4 милиони барели сурова нафта што ги произведува руската нафтена индустрија секој ден.
Министерството за финансии на САД минатата недела воведе нови санкции врз Роснефт, Лукоил и 34 нивни подружници, но одобри трансакции со компаниите до 21 ноември, доколку тие се поврзани со ограничувања на нивните активности поради воведените санкции.
Групацијата „Лукоил“ во земјава работи преку друштвото – ќерка „Лукоил Македонија“ кое е дел од Балканска меѓурегионална група на компании и врши продажба на големо и мало на нафтени деривати.
Компанијата во земјава е присутна од 2005 година и има мрежа од 40 бензински станици и еден нафтен склад. Вработува околу 550 лица.
