Русија испраќа речиси 500 ракети и беспилотни летала над Украина

Украина е цел на напад од речиси 500 руски беспилотни летала и ракети, објави денес украинскиот министер за надворешни работи Андриј Сибиха. Според него, досега е регистриран еден смртен случај, а неколку лица се повредени. Киев и Харков, меѓу другите, се погодени од лавината руски ракети, јавуваат странските новински агенции.

„Украина е нападната од речиси 500 беспилотни летала и крстосувачки ракети. Најмалку едно лице го загуби животот, неколку се повредени“, објави украинскиот министер за надворешни работи Андриј Сибиха на мрежата X, обвинувајќи ја Русија за намерно извршување напади сред бел ден со цел да предизвика што е можно повеќе штети и цивилни жртви.

„Вака Москва одговара на украинските предлози за велигденско примирје – со брутални напади. Руските терористи ги отфрлаат дипломатијата и мировните напори. Тие мора да се соочат со решителните одговори што ги заслужуваат“, додаде тој.

- Advertisement -

Шефот на воената администрација во Киев, Николај Калашников, претходно објави дека главниот град и околниот регион биле под голем напад од руски беспилотни летала и ракети, кој досега одзел најмалку еден живот.

Харков, вториот по големина град во земјата, исто така бил цел на нападите. Според гувернерот на истоимениот регион, Олег Синегубов, градот е под бараж од руски ракети повеќе од еден ден, при што само ноќе се регистрирани четири напади, а се вели дека сирените за воздушен напад речиси постојано се огласуваат.

Во меѓувреме, украинскиот енергетски оператор „Укренерго“ објави дека низ целата земја се воведени итни прекини на електричната енергија како одговор на големите руски напади.