Русија им порачува на демонстрантите да го следат здравиот разум

Руското Министерство за надворешни работи денеска, по повод тримесечните протести во Србија, соопшти дека не смее да се дозволи во оваа земја, која веќе се соочува со бројни надворешни и внатрешни предизвици, да завладее хаос, „изразувајќи надеж дека Србија ќе ги реши проблемите на мирен начин“.

„Исклучително е важно демонстрантите, пред сѐ лидерите на јавното мислење, да покажат здрав разум и да не ги следат оние што будат емоции. Во Србија не смее да се дозволи да завладее хаос во врска со ова. Земјата сѐ уште се соочува со бројни надворешни и внатрешни предизвици“, изјави портпаролката на руското МНР, Марија Захарова, во соопштение на Министерството.

Во одговорот, објавен на веб-страницата на руската Амбасада во Белград, Захарова наведува дека „расколот е најопасна работа“ и додава дека „раководството на Србија прави сѐ за да спречи драматичен развој на настаните“.

- Advertisement -

„Безбедносните органи постапуваат професионално, почитувајќи го правото на народот на мирен собир. Преземени се сериозни чекори за решавање на несогласувањата, имајќи ја предвид загриженоста на граѓаните. Гледаме дека властите ги слушаат најважните сигнали, постои подготвеност за директен дијалог со сите во рамките на политичкиот процес“, рече Захарова.

Таа истакна дека тоа е единствениот правилен начин да се постигне универзален договор во интерес на заштита на суверенитетот, националното достоинство и на традиционалните вредности, односно дека треба се зачува внатрешната стабилност во државата и да се обезбеди нејзиниот територијален интегритет во однос на Косово.

„Убедени сме дека српскиот народ ќе успее да ја зачува братска Србија како независна, самоодржлива, угледна држава и нема да дозволи земјата да го изгуби својот лик. Го цениме нашето пријателство со Србија и сакаме таа што поскоро да ги реши своите проблеми на мирен начин“, заклучи Захарова.