Израел, наводно, размислува за ограничен напад врз иранските нуклеарни локации и покрај тоа што американскиот претседател Доналд Трамп се откажа од планот, објави Ројтерс.
Израелските власти, наводно, размислуваат за ограничен напад врз нуклеарни постројки за кои би била потребна помала поддршка од САД додека американските и иранските претставници се состануваат во Рим на уште една рунда разговори.
Официјален Тел Авив не ја отфрли можноста за напад врз иранските нуклеарни постројки во наредните месеци, и покрај тоа што Трамп му кажа на израелскиот премиер Бенјамин Нетанјаху дека САД засега не се подготвени да поддржат таков потег, објави Ројтерс, повикувајќи се на израелски функционер и уште две лица запознаени со ситуацијата.
„Целосно демонтирање на иранската нуклеарна програма“
Израелците ветија дека ќе го спречат Техеран да се здобие со нуклеарно оружје, а Нетанјаху инсистираше на тоа дека какви било преговори со Иран мора да доведат до целосно укинување на неговата нуклеарна програма.
Американските и иранските преговарачи се подготвени за вториот круг од прелиминарните нуклеарни преговори, кои денеска се одржуваат во Рим.
Во текот на изминатите неколку месеци, Израел и предложи на администрацијата на Трамп голем број опции за напад на ирански објекти, вклучително и некои со временски рамки за доцна пролет и лето, велат изворите.
Плановите вклучуваат комбинација од воздушни напади и операции на командоси кои се разликуваат по интензитет и би можеле да ја забават способноста на Техеран да ја вооружува својата нуклеарна програма за само неколку месеци, една година или повеќе, велат изворите.
„Њујорк тајмс“ во средата објави дека Трамп му рекол на Нетанјаху, на состанокот во Белата куќа претходно овој месец, дека Вашингтон сака да им даде приоритет на дипломатските разговори со Техеран и дека не е подготвен да поддржи напад врз нуклеарни постројки.
Но, израелските власти сега веруваат дека нивната војска наместо тоа би можела да изврши ограничен напад врз Иран за кој би била потребна помала поддршка од САД. Таквиот напад би бил значително поограничен од оние првично предложени од Израел.
Не е јасно дали и кога Израел ќе продолжи со таков напад, особено со оглед на почетокот на преговорите за нуклеарниот договор. Таквиот потег најверојатно ќе го „отуѓи Трамп“ и може да ризикува поширока американска поддршка за Израел.
Џо Бајден (АП)
Делови од плановите и беа претходно презентирани на администрацијата на Бајден, изјавија за Ројтерс двајца поранешни високи претставници на администрацијата на Бајден.
Тел Авив очекува американска поддршка
Речиси сите од нив бараа значителна американска поддршка преку директна воена интервенција или размена на разузнавачки информации. Израел, исто така, побара Вашингтон да му помогне на Израел да се одбрани во случај Иран да се одмазди.
Како одговор на барањето за коментар, Советот за национална безбедност на САД го повика Ројтерс на изјавите што Трамп ги даде во четвртокот кога им кажа на новинарите дека „не го оддалечил“ Израел од нападот, но дека „не брзал“ да поддржи воена акција против Техеран.
„Мислам дека Иран има шанса да има одлична земја и да живее среќно без смрт“, рече Трамп. „Тоа е мојата прва опција. Ако има друга опција, мислам дека тоа би било многу лошо за Иран и мислам дека Иран сака да разговара“.
Канцеларијата на Нетанјаху не одговори веднаш на барањето за коментар. Висок израелски функционер изјави за Ројтерс дека сè уште не е донесена конечна одлука за иранскиот напад.
Од друга страна, висок ирански безбедносен функционер рече дека Техеран е свесен за планирањето на Израел и дека нападот ќе предизвика „остар и непоколеблив одговор од Иран“.
