Рано утрово продолжи потрагата по 16-годишното девојче кое вчера попладне исчезна во водите на реката Вардар кај селото Уланци, општина Градско

Рано утрово продолжи потрагата по 16-годишното девојче кое вчера попладне исчезна во водите на реката Вардар кај селото Уланци, општина Градско, потврдија од Министерството за внатрешни работи и Центарот за управување со кризи (ЦУК).

Спасувачката акција, во која се вклучени припадници на МВР, специјалната единица „Волци“ на Армијата, како и полициски службеници од Полициската станица Велес, е повторно активна од утринава. Потрагата е засилена и координирана, со зголемено полициско присуство на терен.

Од Центарот за управување со кризи информираат дека синоќа потрагата била привремено прекината поради небезбедни услови за претрага во ноќни услови.

- Advertisement -

– Дежурниот оперативен центар на ЦУК беше известен дека екипите се повлекуваат поради немање минимум соодветни услови за безбедна претрага во текот на ноќта. Рано утрово, тимовите продолжија со активностите со взаемна координација и максимален ангажман – изјавија од ЦУК.

Теренот каде се одвива потрагата е тежок и водостојот на реката дополнително ја отежнува мисијата на спасувачките тимови. Надлежните институции апелираат на воздржаност и почитување на насоките за безбедност, особено во близина на водни површини во летниот период.

Инцидентот е пријавен вчера во СВР Велес во попладневните часови, кога било пријавено дека две женски лица, едно на возраст од 16 години и друго од 26 влегле во реката, по што потонале.

„По пристигнувањето на екипите на местото на настанот, 26-годишната девојка е пронајдена жива, додека по малолетното лице сè уште се трага“, информираа од СВР Велес.

Истражните и спасувачки активности продолжуваат во текот на денот, а јавноста ќе биде навремено информирана за сите нови детали.