Путин за првпат од почетокот на војната во Украина испраќа свој близок соработник да преговара во Вашингтон

Рускиот претседател Владимир Путин за првпат од почетокот на војната во Украина испраќа свој близок соработник да преговара во Вашингтон. Кирил Дмитриев, клучен преговарач во име на Москва, оваа недела треба да се сретне со Стив Виткоф, пратнеик на Доналд Трамп за Блискиот Исток кој учествуваше во преговорите за Украина во Ријад.

Целта на нивната средба ќе биде зајакнување на односите меѓу САД и Русија и барање решение за ставање крај на војната во Украина, потврдија за Аксиос два американски службеници.

Веста ја објави и Ројтерс повикувајќи се на истите извори.

- Advertisement -

Дмитриев, образован на Харвард, е директор на рускиот суверен богат фонд РДИФ и претходно беше предмет на санкции од администрацијата на Џо Бајден поради војната во Украина. Министерството за финансии на САД во 2022 година изјави дека „Путин и неговиот близок круг со години ги користеле РДИФ и Дмитриев за собирање средства во странство, вклучително и во САД“.

Дмитриев понекогаш се нарекува „консилиере“ на Путин, алудирајќи на некој што делува како доверлив посредник во сензитивни прашања, иако нема официјална улога на советник на рускиот претседател.

Според извори, американската влада привремено ги суспендирала санкциите за Дмитриев за Стејт департментот да може да му издаде виза. Според други информации, официјално барање за ова претходно било доставено до Министерството за финансии.

Портпаролот на Стејт департментот изјави за Си-Ен-Ен дека податоците за визите се доверливи според американскиот закон и дека тие не можат да коментираат поединечни случаи. Портпаролот на Министерството за финансии одби да коментира. И претставникот на Дмитриев одби да коментира.

Во февруари Дмитриев беше дел од руската делегација во Ријад, каде што почнаа првите неформални разговори за можен крај на конфликтот во Украина. Тој претходно соработуваше со Виткоф за ослободување на американскиот учител Марк Фогел од руски затвор, што администрацијата на Трамп го карактеризираше како гест на добра волја.

Трамп во интервју за Ен-Би-Си неодамна рече дека не е задоволен и од Москва и од Киев и дека може да воведе нови санкции кон Москва поради коментарите на Путин за украинскиот претседател Володимир Зеленски.