Прочитале писмен податок дека „рено кангу“ е во Скопје, во време во кое ЈО тврди дека е во Велес

Не го покажавме видеото што го најавивме на претходното рочиште затоа што ние како адвокати немаме таков систем и таков софтвер за да можеме да ги отвориме цедињата од „Сејсф сити“, рече адвокатот Јовица Страшевски по денешното рочиште за убиствата на Вања Ѓорчевска и на Панче Жежовски, за кои првообвинет е неговиот клиент Љупчо Палевски Палчо.

– Јас го донесов мојот лаптоп и пред судијата презентирав дека не можам да ги отворам цедињата. Сега ќе направиме повторно увид во Судот за да го најдеме цедето со конкретната снимка, но најдобро е Обвинителството, кое веќе го презентираше цедето, да го извади видеото и да го пушти – рече Страшевски.

На новинарско прашање како тогаш знаат дека има видеоснимка од „рено кангу“ во Скопје на полноќ помеѓу 21 и 22 ноември 2023 година, кога воопшто не ја виделе, адвокатот рече дека за таа снимка виделе писмен податок во извештајот што го добиле од ЈО за тие докази.

- Advertisement -

– Од доставените докази во писмена форма. И во извештајот што го даде ЈО за тие докази, го има наведено „рено кангу“ во Скопје во тој период. Писмено го има како податок – рече Страшевски.

На претходното рочиште Палевски најави дека ќе ја пушта оваа снимка, во траење од неколку секунди, со која ќе докаже дека на полноќ помеѓу 21 и 22 ноември 2023 година, „рено кангу“ е во Скопје. Тоа е ноќта пред убиството на Жежовски и за тој период ЈО тврди дека „рено кангу“ е паркирано пред куќата на Манев во Велес.

Во врска со барањето на одбраната на Палевски да се дополни вештачењето на чаурата што е пронајдена на местото на убиството на Панче Жежовски во околината на Велес и да се испита вештакот, адвокатот посоли дека ЈО има пропусти.

– Кога некој се товари за убиство невозможно е за најдена чаура да побарате само вештачење од какво оружје е испукана и од кој калибар е, без притоа да биде чаурата и балистички вештачена, за да се утврди дали е испукана од оружје кое е легално, за кое некое лице има дозвола, или е од нелегално оружје, купено на црн пазар, До денес ЈО не го сторило тоа, а товари лица за две убиства. Ние бараме да дојде вештото лице и да утврдиме дали има направено балистика и дали е утврдено дали потекнува од легално оружје или не. И да се види дали има ДНК траги на самата чаура – рече Страшевски.

Во врска со можноста чаурата да е од пиштолот на обвинетиот Боре Видевски, кој имал дозвола за питол, но тој не е пронајден, адвокатот рече дека не тврди дека е од пиштолот на Видевски.

– Но, не може да најдете оружје кај лица што ги обвинувате за убиства, а тоа оружје да не го испратите на вештачење. Кај Боре Видевски е најдена пушка, и таа пушка не е вештачена, туку е однесена во магацин и поведена е управна постапка за одземање на оружјето – рече адвокатот Страшевски.