Пчеларите до крајот на април треба да ја пријават моменталната состојба во нивните пчелни семејства, со цел да добијат документација за субвенции. Ветеринарниот лекар од Штип, Крсто Митев апелира обврската да биде завршена навремено, за пчеларите да аплицираат и да добијат субвенции за нивните пчелни семејства.
– Со годишната наредба од страна на Агенцијата за храна и ветеринарство за оваа година и овој период од годината, можам да апелирам до сите оние држатели на пчелни семејства, обврската нивна за пријавување е до крајот на месец април, што значи должни се да дојдат во ветеринарната станица да ја пријават нивната моментална состојба во пчеларникоТ, како би можеле да се стекнат со право за аплицирање и добивање документација за субвенции – изјави Митев.
Тој додаде дека и до крајот на наредниот месец пак се зема крв за откривање на болест кај козите и овците. И ова е со иста цел да сточарите да добијат соодветна документација со што би можеле да аплицираат и да дибијат субвенции.
– Земањето крв за откривање болести кај козите и овците е во тек. Оваа акција ќе треба да ја спроведеме до крајот на месец мај. Сите оние држатели на овци и кози се должни да се јават, како би можеле да направиме термин за истите да се стекнат со правото за аплицирање на документација за субвенции – вели Митев.
Согласно законската регулатива пчеларите за да добијат субвенции треба да имаат најмалку десет пчелни семејства, а висината на директни плаќања изнесува 600 денари по пчелно семејство.
