Претседателот на САД бил трогнат кога ја видел сликата

Претседателот на Русија, Владимир Путин, му дал портрет на претседателот на САД, Доналд Трамп. Путин му го дал портретот на Трамп на американскиот специјален пратеник Стив Виткоф во Москва претходно овој месец, потврди портпаролот на Кремљ, Дмитриј Песков.

Подарокот првпат го спомна Виткоф во интервју минатата недела со поранешниот водител на Фокс њуз, Такер Карлсон. Виткоф му рекол на Карлсон дека Трамп „бил трогнат“ од портретот, кој го опишал како „убав“.

Виткоф се состана со Путин по разговорите со руските претставници за завршување на војната во Украина. Преговорите за прекин на огнот продолжија вчера во Саудиска Арабија, каде што американските претставници се сретнаа со нивните руски колеги, еден ден по средбата со украинските преговарачи.

- Advertisement -

За време на интервјуто со Карлсон, Виткоф се присети како Путин му рекол дека се молел за Трамп минатата година кога слушнал дека бил застрелан на митинг во Пенсилванија.

– Тој се молеше за својот пријател – рече Виткоф, раскажувајќи ги коментарите на Путин.

Во 2018 година, Путин му подари фудбалска топка на претседателот Трамп. Тајната служба ја проверила топката дали има уреди за прислушкување пред Трамп да му ја даде на својот син.

Трамп не е првиот актуелен претседател кој добил подарок од Путин. Во 2021 година, Путин му подари на Џо Бајден комплет за пишување, во вредност од 12.000 долари, кога се сретнаа на самитот во Женева. Тој наводно му испратил на Барак Обама порцелански чинии и шолји за еспресо во 2013 година.