Премиерот ја повика ДУИ да му донесе докази за наводната корупција на вицепремиерот

Премиерот Христијан Мицкоски ја повика ДУИ да му ги достави сите документи со кои располага во врска со наводната корупција на потпретседателот во Владата и министер за животна средина Изет Меџити и неговиот шеф на кабинет.

– Јас со потпретседателот на Владата имам непосредно исклучиво блиска соработка и имам целосна доверба во неговото работење. Апсолутно ги повикувам сите оние кои поседуваат било какви докази за тоа на кои се повикуваат оние од ДУИ да дојдат и да ги донесат. Го имаат мојот број, сите го знаат, денес-утре да дојдат и ако сум на седница ќе ја напуштам за да ги видам тие докази и да ги предадеме на соодветните органи кои треба да постапуваат. Во спротивно ги предупредувам оние од ДУИ дека продолжуваат да сеат пердуви, да занимаваат со магла, магла којашто е оптоварена со зборот корупција која беше нивно второ име во минатото во кое што главен атрибут беше трговскиот центар Соравија, „ролс ројс“ автомобилите на сватовите, деловните простории на неговиот потпретседател… Ги разбирам дека тоа е во нивната потсвест, но јас имам доверба во работењето на Меџити – рече Мицкоски.