Преговарачките тимови на САД и Кина постигнале начелна согласност за заедничка рамка за за деескалација на трговските тензии меѓу двете најголеми економии во светот, која сега треба да биде одобрена од претседателите Доналд Трамп и Си Џинпинг.
– Двете страни се согласија на заедничка рамка и ќе ја презентираат пред своите лидери – изјави кинескиот претставник за меѓународна трговија Ли Ченган по дводневната средба во Лондон.
Американскиот министер за трговија Хауард Латник објасни:
-Ние ќе се вратиме и ќе разговараме со претседателот Трамп за негово одобрување, а тие ќе направат истото со претседателот Си.
Клучно прашање во преговорите се ретките земните метали и магнети од Кина – стратешки суровини за батерии, ветроелектрани и одбранбени технологии. САД бараат враќање на обемот на испораки на ниво што бизнисите го сметаат за оптимален, истакна економскиот советник Кевин Хасет.
Вашингтон и Пекинг се согласија на привремено примирје минатиот месец за трговските тарифи, но двете земји оттогаш се обвинуваат меѓусебно за кршење на договорот.
САД изјавија дека Кина е бавна кога станува збор за извоз на ретки минерали и магнети, неопходни за производство на уреди како што се паметни телефони или електрични возила. Во меѓувреме, Вашингтон го ограничи пристапот на Кина до американски стоки како што се полупроводници и други технологии поврзани со вештачката интелигенција.
Новата рунда преговори дојде по телефонскиот разговор меѓу Трамп и Си минатата недела, кој американскиот претседател го опиша како „многу добар разговор“.
Кина беше најтешко погодена од царинската политика на американскиот претседател. Пекинг одговори со повисоки царини за американскиот увоз, што доведе до реципрочно зголемување на царините што достигнаа врв од 145%.
