Повеќе од педесет маскирани мажи, главно млади, вечерва се појавиле пред Српскиот културен центар на улицата „Прерадовиќева“ во Загреб, каде што се одржува изложба. Тие се собрале очигледно како знак на протест против одржувањето на Деновите на српската култура.
Полицијата брзо пристигнала, но на местото на настанот прво имало само неколку припадници на интервентната полиција и неколку полицајци во цивил, а подоцна пристигнале бројни полициски сили. Групата мажи ја запеала песната „О, Хрватска, о Хрватска, независна држава“ и скандирала „За дом спремни“, по што се оддалечила од местото.
Потоа започнала потерата на полицијата по нив. Една група од десетина мажи била запрена на улицата „Далматинска“. Полицијата им ги проверила документите и ги пуштила.Но потерата по учесниците во инцидентот продолжила и на други места во центарот.
Телевизијата „Вида ТВ“ објави снимка од улицата „Гајева“ на која се гледа како полицајци меѓу автомобилите трчаат по младите.
„Каде ќе бегаш?! Застани!“, се слуша како полицаец вика кон млад човек кој бега од него.
Во еден момент, еден од маскираните хулигани плукнал кон фото-репортерката на „Индекс“. Новинарката на „Вида ТВ“ го снимала инцидентот, токму во моментот кога маскираните мажи си заминувале. Тие почнале да ѝ дофрлаат навреди, а некои ѝ се доближиле. Еден од мажите плукнал во нејзина насока.
