ПОТРЕБНА Е РЕФОРМА НА ЈАВНИТЕ КОМУНАЛНИ ПРЕТПРИЈАТИЈА ВО МАКЕДОНИЈА

Топ Вести - Слушај сега

Во организација на Здружението на даватели на комунални услуги во Охрид се одржува настанот „Денови на АДКОМ – Денови на комунални услуги“.

- Advertisement -

Настанот ги обединува претставниците на институциите, јавните комунални претпријатија, локалната самоуправа и меѓународни експерти, со цел отворање на клучни прашања и предизвици во комуналниот сектор. Учествуваат и директорите на битолските јавни претпријатија Водовод, Комуналец и Нискоградба.

Во рамките на настанот има две панел-сесии. На првиот панел на тема „Кластеризација на секторот за водни услуги – придобивки и предизвици“ се дискутираше за можностите за реорганизација на водниот сектор, подобрување на инфраструктурата и координацијата на институциите.

Меѓу панелистите е и градоначалникот на Битола, Тони Коњановски, како и заменик министерката за животна средина и просторно планирање Ане Лашкоска.

Градоначалникот Коњановски зборуваше за предизвиците со кои се соочија во минатото јавните претпријатија во Битола, а го спомена и примерот со меѓуопштинското претпријатие „Пелалинк“ кое опфаќа три општини, што беше поздравено од присутните како практичен пример на темата на која се дискутира.

– Општина Битола има осум јавни претпријатија, „Водовод“, „Комуналец“, „Нискоградба“, „Паркинзи“, „Пазари“, индустриската зона „Жабени“, јавно претпријатие за урбанистичко планирање и „Пелалинк“ јавно претпријатие за превоз на патници, кое е задничко со општините Могила и Новаци. Ако тргнеме од ова последното, можам да кажам дека позитивни се искуствата и токму тука се случи тоа окрупнување, односно создавање на едно претпријатие за повеќе општини – рече градоначалникот на Битола Коњановски.

Според него современото управување со комуналните услуги е пред историски предизвик.

Кластеризацијата се однесува на соработка помеѓу општините со цел да се подобри ефикасноста и одржливоста на водните услуги. Преку споделување инфраструктура, техничка експертиза и ресурси, комуналните претпријатија можат да функционираат на поефикасно ниво, при што се задржува локалната сопственост и одговорност.

Меѓуопштинската соработка може да вклучува физичка интеграција на системи и инфраструктура, заедничко управување со водните услуги на регионално ниво или споделување оперативни, финансиски и технички капацитети.

На втората панел-сесија на тема „Дефицит на млади кадри во комуналниот сектор и позицијата на младите“, фокусот е на предизвиците со недостиг на млади кадри, образованието и можностите за задржување на работната сила.