Портокалово и жолто предупредување од УХМР за силен јужен ветер

Управата за хидрометеоролошки рабори издаде портокалов и жолт аларм за силен ветер утре во Македонија.

„Во теков на ноќва ќе дува јужен ветер, кој утре преку денот ќе биде со засилен до силен интензитет и локално ќе надминува брзина од 70 километри на час“, се вели во предупредувањето од УХМР.

- Advertisement -

Портокаловото предупредување е издадено за Западна Македонија, а жолто за источните и за северните региони. За Струмица, Гевгелија и за Валандово нема предупредување.

Времето утре ќе биде променливо облачно и релативно топло, со повремени локални врнежи од дожд, најавува УХМР.

Наместа врнежите ќе бидат поројни со услови за појава на грмежи.

Температурите се во пораст, па така, минималната утринска ќе се спушти до 8 степени во Берово, а најтопло ќе биде во Демир Капија и во Гевгелија, со температура до 24 степени Целзиусови.

Во Скопје времето ќе биде променливо облачно, претпладне со повремен дожд, кој локално ќе биде пороен. Ќе дува умерен ветер од југозападен правец. Температурата ќе се движи од 13 степени наутро до 23 степени преку денот.

Во сабота ќе има преодно стабилизирање на времето.

Од недела до вторник ќе преовладува променливо облачно време со повремени локални врнежи од дожд.

Во понеделник наместа врнежите ќе бидат пообилни и поројни со услови за појава на грмежи.

Ќе дува засилен, повремено силен ветер од јужен правец со брзина од 70 километри на час.

Алармите за предупредување на населението од временски непогоди се издаваат во жолта, портокалова и во црвена боја и се дел од системот за метеопредупредувања во Европа. Жолт аларм значи умерена опасност од временските прилики, со можност за умерени последици по околината, портокалов значи дека опасноста е голема, а црвениот аларм предупредува за екстремна опасност, со можност за катастрофални последици по луѓето, нивните имоти и по околината.

Алармите се издаваат за различни временски прилики и појави: за ветер, дожд, горештина, студ, снег, мраз, грмотевици, крајбрежни настани, шумски пожари, лавини, поплави, порои, опасности на море и за суша.