Поранешна стјуардеса која долго време работела во странска авиокомпанија во Белград за српски „Мондо“ изјавила дека е точно признанието на познатиот глумец дека пијан управувал авион со 300 луѓе.
– Гледав документарец за Чарли Шин и можам само да кажам дека она што го кажа е ужасно… ако беше откриено тоа тогаш, некој најверојатно ќе завршеше во затвор – изјавила жената велејќи дека нејзин колега бил отпушен кога се дознало за случајот, тврди медиумот „Мондо“.
Според неа, во 1990тите години постоела ваква пракса да им се дозволува на познати личности да влезат во пилотската кабина.
– На почетокот на мојата кариера во авијацијата, се сеќавам дека се случуваше пилотите, кога ќе откриеа дека има атрактивен пејач или јавна личност што им се допаѓа во летот, да им кажат на стјуардесите да ја поканат во пилотската кабина. Иако безбедносните протоколи не дозволуваат никој друг освен членовите на екипажот да влезе во пилотската кабина за време на летот, па… ќе кажам само дека тоа не беше многу почитувано.
Чарли Шин во документарец на „Нетфликс“ призна дека во 1995 година облечен во пилотска јакна и капа, пијан и лут на сопругата, го презел управувањето со авион полн со патници. Признание го шокираше режисерот Ендру Ренци и ја разбранува јавноста во САД.
– Еве ме, пијан, со речиси 300 луѓе кои спијат зад мене, лута невеста 20 стапки зад мене, и почнувам да го летам овој авион – изјави Шин во првата епизода од документарецот.
Шин тврди дека откако го поканиле кратко да управува со авионот, копилотот, загрижен за безбедноста, веднаш го активирал автопилотот.
Во продолжение од серијата, Шин го обвини и Николас Кејџ за слична ексцентричност. Според актерот, Кејџ наводно се преправал дека е ментално нестабилен пилот, користејќи го системот за јавно обраќање на авион, што завршило со интервенција од полицијата.
Признанието се совпадна со објавувањето на друг документарец за пад на авион во кој загинаа 75 лица, откако пилотот им дозволил на своите деца да седнат на командното место. Сличностите ги зголемија реакциите.
