По тридневната тирада од расистички и антисемитски изјави на раперот Канје Вест, Илон Маск потврди дека јавноста повеќе нема да го гледа профилот на Икс на контроверзниот музичар, објави Економик тајмс.
Се чини дека Маск го избришал профилот на Канје Вест, потврдувајќи дека „неговиот профил сега е класифициран како небезбеден за работа со оглед на тоа што го објавил.
„Тоа веќе не треба да биде нешто што го гледате“, рече Маск во својата објава на Икс.
Икс го деактивираше профилот на американскиот рапер откако неговите најнови изјави предизвикаа жестоки реакции во јавноста. Вест, кој во изминатите години веќе неколкупати беше обвинет за ширење говор на омраза, овој пат отиде чекор понатаму со шокантна изјава: „Јас сум нацист. Го сакам Хитлер. И што сега?“
Контроверзните коментари на Вест беа објавени за време на викендот и веднаш предизвикаа осуди од повеќе јавни личности, организации за човекови права и од политички лидери. Како одговор на неговите испади, платформата Икс во понеделник наутро го деактивираше неговиот профил, спречувајќи го понатамошното ширење на вакви пораки.
Ова не е првпат Вест да се соочи со последици поради своите изјави. Минатата година загуби бројни деловни договори, вклучувајќи го и милионскиот договор со „Адидас“, поради неговиот контроверзен говор. Иако неколкупати тврдеше дека не е антисемит, неговите изјави продолжуваат да предизвикуваат осуда и да му носат забрани на социјалните мрежи и во деловниот свет.
Останува да се види дали оваа најнова забрана ќе има трајни последици врз неговата кариера, или, како и во претходните случаи, ќе најде начин повторно да се врати во јавноста.
