Покрената истрага против францускиот актер

Францускиот актер Жерар Депардје е осомничен за сериозна даночна измама и против него е покрената истрага, јавува „Франс 24“, повикувајќи се на извори блиски до случајот.

Депардје (76), кој се соочува со серија случаи поврзани со сексуален напад и силување, е осомничен за затајување данок и перење пари „во особено големи размери“.

Покрај тоа, тој е осомничен дека лажно го пријавил своето даночно живеалиште во Белгија од 2013 година, рекол изворот.

- Advertisement -

Истрагата за неговиот даночен статус, која овој месец ја отворија обвинителите за финансиски криминал, а сега ја води полицијата, вклучи рации во Франција и Белгија, како и полициско испрашување, рекол изворот.

Депардје е најистакнатата личност која се соочува со обвинувања во рамките на движењето #MeToo во француската кинематографија.

Во октомври, судот во Париз го одложи судењето за сексуален напад до март, откако адвокатот на Депардје рече дека актерот е премногу болен за да се појави на суд.

Депардје ги негираше обвинувањата против него.

Во декември 2012 година, тој објави дека се сели во Белгија „од даночни причини“, протестирајќи против оданочувањето на богатите, кои ги воведе тогашниот француски претседател Франсоа Оланд.

Потоа се насели во Нечин, белгиски град во близина на француската граница познат по тоа што е дом на богати иселеници.

Неговото заминување беше опишано како „мошне патетично“ од тогашниот француски премиер Жан-Марк Еро.

Набргу потоа, во јануари 2013 година, Депардје доби државјанство од рускиот претседател Владимир Путин.

На актерот во март ќе му се суди во Париз за сексуален напад на две жени во текот на снимањето на филмот на Жан Бекер „Les Volets verts“ во 2021 година.

Судот, исто така, нареди да му се суди за силување на актерката Шарлот Арнол во 2018 година, што актерот го оспорува.

Истражниот судија кој го води овој случај сè уште не се изјаснил дали судењето ќе биде одржано.