Модернизацијата и унапредувањето на јавната администрација се темел на функционален јавен сектор, кој е двигател на секое демократско општество. Формирањето на Министерството за јавна администрација е стратешки одговор на Владата за забрзување на реформите и за подобрување на ефикасноста и транспарентноста на институциите, рече денеска министерот за јавна администрација, Горан Минчев, на промоција на Извештајот за мониторинг на организацијата СИГМА за 2024 година.
Минчев вели дека Министерството активно работи на имплементација на мерките од Стратегијата за реформа на јавната администрација. Посебен фокус е ставен на департизацијата и на професионализацијата, како и на воспоставување кохерентен систем на плати.
– Граѓаните мора да имаат доверба во институциите и да чувствуваат дека тие работат во нивен интерес. Затоа, реформите мора да бидат инклузивни, а процесот на креирање политики транспарентен. Подготвивме нови законски решенија, закон за административни службеници, закон за вработените во јавниот сектор и закон за стручно усовршување, кои наскоро ќе бидат предложени на Владата и Собранието – посочи министерот.
Минчев го најави и новиот закон за инспекцискиот надзор, кој треба да воведе структурни промени за подобра координација на инспекциските служби и за намалување на административните трошоци.
Во врска со европските интеграции, миистерот Минчев истакнал дека оценките од Европската комисија ќе бидат земени предвид за унапредување на процесот.
-Благодарни сме на СИГМА за нивната континуирана поддршка. Ова партнерство е клучно за градење капацитети и за приближување кон европските стандарди. Уверен сум дека со заеднички напори ќе се постигнат поставените цели за модерна и ефикасна јавна администрација – рече Минчев.
