Почина Вал Килмер, холивудскиот актер кој ја стекна славата благодарение на главните улоги како Џим Морисон и Бетмен

Вал Килмер, холивудскиот актер кој ја стекна славата благодарение на главните улоги како Џим Морисон и Бетмен, а чии камелеонски таленти и таинствена личност истовремено придонесоа за неговата препознатливост во споредните улоги, почина во вторникот во Лос Анџелес. Килмер имаше 65 години.

– Причината за смртта е пневмонија (воспаление на белите дробови) – изјави неговата ќерка Мерцедес Килмер.

На Килмер му беше дијагностициран рак на грлото во 2014 година, од кој подоцна се опорави, додала таа, пренеува „Њујорк тајмс“.

- Advertisement -

Висок и згоден на начин кој често се поврзува со рок ѕвездите, Вал Килмер на почетокот на својата кариера  неколкупати беше избиран за улогите на музичар, кога се чинеше дека е предодреден за успех на големото платно.

Дебитираше во шпионскиот филм сместен во добата на Студената војна, „Top Secret!“ (1984), во кој толкуваше американски пејач кој ја освојува публиката во Берлин со својата харизма и заводливи движења, несвесно вплеткувајќи се во источногермански заговор чија цел е повторно обединување на земјата. Тој особено се истакна со својата стилизирана и импресивна интерпретација на Џим Морисон – симбол на психоделична сензуалност – во филмот на Оливер Стоун „The Doors“ (1991).

Килмер ќе остане запаметен и по улогата во култниот акционен хит „Top Gun“ (1986), каде го играше Том „Iceman“ Казански, ладниот ривал на Маверик кој го глумеше Том Круз.

Во филмот „True Romance“ (1993), насилна и адреналинска потрага по дрога, напишана од Квентин Тарантино, а во режија на Тони Скот, тој имаше незаборавна епизодна улога како Менторот – Елвис кој го советува антихеројот кој го игра Кристијан Слејтер, појавувајќи се како визија од главниот лик.

Вал Килмер исто така имаше забележителни улоги во филмови како „Thunderheart“ (1992), во кој глумеше неискусен агент на ФБИ кој истражува убиство во индијански резерват во Јужна Дакота и „The Saint“ (1997), трилер за лукав крадец со морален кодекс кој игра мачка и глушец со руската мафија.

На многумина им останува најпознат по неговата насловна улога (и костим) во „Бетмен засекогаш“ (1995 година), во која, меѓу Мајкл Китон и Џорџ Клуни, се најде како нов заштитник на Готам Сити, борејќи се против Две лица (Томи Ли Џонс) и Ридлер (Џим Кери).