По Лувр, нова тешка кражба ја посрами Франција

Топ Вести - Слушај сега

Главниот „келнер“ на францускиот претседател, службеникот задолжен за приборот и порцеланот во Елисејската палата, се најде меѓу обвинетите во скандал што ја потресе најпознатата резиденција во Франција. Тој бил уапсен под сомнение дека со двајца соучесници украл и се обидел да продаде вредни државни предмети преку интернет.

- Advertisement -

Од Елисејската палата исчезнал порцелан вреден 40.000 евра. Украдените предмети се вратени во палатата, а француските медиуми го споредуваат случајот со неодамнешната кражба во „Лувр“, каде што уште сè трага по накит вреден 88 милиони евра.

Истрагата започнала кога вработени од познатата фабрика „Севр“ забележале дел од исчезнатите парчиња на платформата „Винтед“. Меѓу нив имало порцелан со печат „Француски воздухопловни сили“, пепелници и бакарни садови, кои никогаш не биле достапни за јавноста.

При претрес на домот и службеното шкафче на осомничениот биле пронајдени околу сто предмети – порцелан, чаши „Бакара“, статуа од Рене Лалик и дури прибор што се користел при официјални државни свечености.

Главниот службеник, задолжен за одржување и инвентар на престижниот прибор за јадење што го користат претседателите и гостите од целиот свет, водел прецизни листи со планови за идни кражби, тврдат обвинителите.

Тој и неговите соучесници биле изведени на сослушување и ослободени под надзор – со забрана за контакт меѓусебно, за посета на аукциски куќи и за професионална активност. Судскиот процес е закажан за 26 февруари следната година.

Во последните месеци Франција е погодена од серија слични кражби: од Природонаучниот музеј во Париз исчезнале златни грутки од 1,5 милион евра, од музејот во Лимож, кинески порцелан од 6,55 милиони, додека во Лангр биле однесени 2.000 златни и сребрени монети вредни 90.000 евра.