Состојбата со пожарите во Македонија денеска до 12:15 часот е алармантна, во тек се вкупно 11 пожари на отворен простор, од кои пет сè уште активно беснеат, два се ставени под контрола, а четири се целосно изгаснати. Огнот зафаќа шуми, ниска вегетација, но и се приближува до населени места, што дополнително ја влошува ситуацијата.
Најкритична е состојбата на истокот и југозападот на земјата. Во реонот меѓу општините Василево, Радовиш и Берово, на планинските предели Голем Готен и Малешевските Планини, пожарот уништува нискостеблеста шума, смрека и густа ниска вегетација. Се работи за труднопристапен терен, што го отежнува гаснењето и го зголемува ризикот за негово проширување.
Во Македонски Брод, ситуацијата е драматична на две локации: во село Грешница, каде што гори мешана шума и трева, како и во подрачјето меѓу селата Локвица и Крапа, каде се шири низ деградирана дабова шума и густи грмушки.
Во Прилеп, огнот ги зафаќа шумските масиви кај селото Бешиште, на локалитетот Бешишки Рид, додека во Желино, огнен фронт беснее меѓу селата Церово и Групчин, уништувајќи деградирана шума и нискостеблеста вегетација. Во сите овие случаи, пожарникарите се соочуваат со променлив ветар, високи температури и тежок пристап, што ја прави интервенцијата ризична и непредвидлива.
Сепак, има и позитивни вести. Два пожара се ставени под контрола. Едниот е кај Прилеп, меѓу селата Царевиќ и Смолани, во пределот познат како Радобилски Рид, каде што гореше мешана шума. Вториот контролираниот пожар е во Македонски Брод, кај селото Латово, на локалитетот Маркова Стапалка, каде гореше грмушкаста вегетација и сува трева.
Во меѓувреме, четири пожари се изгаснати, меѓу нив и оној во Битола, кај селото Ново Лагово, каде се гореше сува вегетација. Пожар избувна и кај тунелите на автопатот Е-75 во Демир Капија, но беше брзо ставен под контрола. Во Куманово, во населбата Средорек, запален отпад создаде локализиран проблем, кој заврши без поголеми последици. Пожар имаше и во Дебар, кај селото Рајчица, каде што изгоре дел од нискостеблестата шума.
Надлежните апелираат на внимателност, особено во шумските и руралните предели. Пожарите можат лесно да излезат од контрола, а според синоптичките најави, временските услови во наредните денови нема да помогнат: остануваат суво време и високи температури.
