Црвено море од 200.000 илјади знамиња се разлева низ Чанг’ан авенијата во Пекинг, менувајќи го урбаниот пејзж на градот само часови пред најавената воена парада за Денот на победата на 3 септември.
Знамињата се симтерично поставени од плоштадот Тијананмен до мостовите во близина, додека центарот е затворен поради обемните подготовки за настанот на кој кинескиот претседател Си Џинпинг ќе ја покаже новата воена моќ на земјата, солидарност со Русија и со Глобалниот југ, но и ќе прослави 80 години од завршувањето на Втората светска војна.
Токму под портретот на Мао Це Тунг, поставен над портата на Небесниот мир, стојат 8 џиновски кинески знамиња, пишува Би-Би-Си давајќи некои од деталите за утрешниот настан. Како стражи на еден нов светски поредок, каков што најави Си Џинпинг во контроверзна изјава без да ги спомене САД, а притоа алудирајќи дека треба да се остават на страна сеништата од Студената војна.
Неговата изјава на самит во Тијенџин пред најавената парада ја поддржа рускиот претседател Владимир Путин велејќи дека членството во ШОС, Шангајската организација за соработка, може да дојде до поправедно глобално управување и мултиполарен свет.
Утре, Кина ќе го покаже своето лице — во формации, флорални скулптури и ракетни силуети. А портретот на Мао, со Путин и Ким под него, веднаш до Џинпинг, ќе биде сведок на спектаклот што се подготвува со месеци.
„Ким Џонг Ун е изненадувачки додаток, неговото присуство беше објавено дури на крајот на минатата недела, а неговиот оклопен воз и вообичаената колона со телохранители ќе го дополнат спектаклот“, пишува Би-Би-Си.
Флоралните инсталации се редат долж патот на главниот плоштад Тјананмен во Пекинг: џиновски букети, формирани од илјадници цвеќиња, се поставени како почест на победата во Втората светска војна.
Утре, 3 септември, се очекува присуство на 26 светски лидери — меѓу нив рускиот претседател Владимир Путин, севернокорејскиот лидер Ким Џонг Ун, премиерот на Србија Александар Вучиќ и словачкиот премиер Роберт Фицо.
Фицо во денешна изјава од Тијенџин рече дека Словачка ќе биде дел од новиот светски поредок, додека ЕУ, како што вели, се однесува како навредено дете. Фицо го коментираше фактот дека ниту еден друг лидер од Европа нема да присуствува на Парадата.
Но денес, 2 септември, на генералната проба, сцената им припаѓа на војниците, инженерите и режисерите на совршенството.
Пекинг е блокиран. Метро-линиите се затворени. Училиштата и хотелите долж трасата се под клуч. Илјадници жители се замолени да останат дома, а оние што живеат покрај Чанг’ан не смеат ниту да излезат на балкон.
Војничкиот ритам веќе се слуша — тенкови тропаат по улиците, беспилотни летала летаат пробно, звучници одекнуваат команда по команда.
Според Ројтерс, на парадата утре се очекува да продефилираат 45 формации: пешадија, борбени возила, артилерија, беспилотни подводни дронови, нови хиперсонични ракети…Во воздухот ќе се кренат околу 100 воени авиони и хеликоптери — некои носат монументални знамиња, други оружје со кое Кина демонстрира нова ера на одбрана.
Покрај патот, две џиновски цветни структури го симболизираат отпорот кон јапонската агресија во Втората светска војна. Јапонците се предале во 1945 година.
Слични флорални мотиви се поставени на клучни крстосници, мостови и кружни текови — боја на секоја раскрсница, структура во секој детал. Камери се поставени на секој агол. Војници, некои во армиски униформи, чуваат надвозници во целодневна смена од 24 часа.
Денес е тивко. Но не е мирно. Сè е во исчекување.
Парадата треба да започне во утринските часови, во 9:00 часот по локално време во Пекинг, според официјалната агенција Синхуа и други кинески медиуми Тоа значи, сметано по македонско време, настанот почнува во 4 часот наутро.
