Два руски проектили го погодија центарот на украинскиот град Суми во неделата, при што загинаа 34 лица, а беа повредени 117. Тоа беше најсмртоносниот руски напад оваа година.
Украинскиот претседател Володимир Зеленски повика на остра меѓународна реакција против Москва по нападот.
Лидерите на Германија, Велика Британија и Италија го осудија нападот, а американскиот претседател Доналд Трамп рече дека нападот е ужасен.
„Ми беше кажано дека тоа е грешка“, откри тој без да го објасни тврдењето: „Но, мислам дека тоа е ужасна работа“.
Лицата кои беа убиени биле во автомобили, јавен превоз и станбени згради во моментот на нападот, изјави украинскиот министер за внатрешни работи Ихор Клименко.
„Ова е намерно убиство на цивили на важен црковен ден“, рече тој, потсетувајќи дека се празнува Цветници, пренесува Дневник.
Русија негира дека целела цивили, но илјадници се убиени од почетокот на инвазијата во февруари 2022 година. Руските власти не одговорија на истрагата на Ројтерс за нападот во неделата.
Марјана Безухла, украинска парламентарка позната по нејзините остри критики кон воените лидери, на апликацијата Телеграм објави дека нападот се случил поради протечените информации дека голем број украински војници ќе се соберат во областа Суми.
Ројтерс не беше во можност самостојно да ја потврди информацијата, Бежула не даде никаков доказ за нејзиното тврдење, а жителот на Суми, Павриз Манхов, рече дека не видел војници во областа.
„Живееме во центарот на градот. Таму нема воена база, нема војници“, посочи тој.
Сепак, смртоносниот напад на Сумија се случил во моментот на доделувањето на наградите за украинските војници, објави порталот „Украинска правда“, повикувајќи се на градоначалникот на Конотоп, Артем Семенихин и неколку други извори.
Церемонијата, наводно, ја организирал Володимир Артјук, шеф на воената администрација на регионот Суми, за да им додели благодарници и медали на „херојските момци“ од 117-та бригада. Правда пишува дека војниците не се повредени бидејќи во моментот на нападот сите биле во засолниште.
