Остануваат мерките против Асадовиот режим

Шефовите на дипломатиите на Европската Унија попладнево донесоа одлука за укинување на економските санкции врз Сирија, со цел да го поддржат сирискиот народ во обнова и стабилизација на земјата, соопшти високата претставничка на ЕУ за надворешни работи и безбедносна политика, Каја Калас.

„Сакаме да му помогнеме на сирискиот народ да изгради нова, инклузивна и мирна Сирија“, напиша Калас на социјалната мрежа Икс, додавајќи дека „ЕУ отсекогаш стоела покрај Сиријците во текот на последните 14 години – и ќе продолжи да го прави тоа“.

Калас нагласи дека Европската Унија има за цел да игра водечка улога во закрепнувањето и идната реконструкција на Сирија, по повеќегодишната војна и хуманитарна катастрофа што ја зафати земјата.

- Advertisement -

Сепак, остануваат во сила санкциите против поединци и организации поврзани со режимот на поранешниот претседател Башар ал-Асад, како и против оние одговорни за насилната репресија и кршењето на човековите права.

Исто така, ограничувањата за извоз на оружје, како и за стоки и технологии што би можеле да се користат за внатрешна репресија, ќе продолжат да важат.

Како што потсетува агенцијата ДПА, земјите-членки на ЕУ уште во февруари се согласија за постепено олеснување на санкциите, како дел од стратегијата за поттикнување на економското закрепнување, стабилизација и долгорочна реконструкција на Сирија. Првите мерки, во секторите енергетика, транспорт и банкарство, беа суспендирани до јуни оваа година.