Унгарскиот премиер Виктор Орбан го оцени присуството на руски дронови во воздушниот простор на Полска како неприфатливо, но истовремено нагласи дека таков развој на настаните бил очекуван.
Во своето редовно радио-обраќање, Орбан истакна дека инцидентот се случил токму на полска територија, што ја прави реакцијата уште поитна.
– Од првиот момент влегувањето на руските дронови го опишавме како неприфатливо и стоиме со Полјаците, бидејќи сме 100 проценти солидарни со нив – изјави Орбан.
Премиерот додаде дека Полјаците се историски сојузници и пријатели на Унгарија, и дека Унгарија треба да биде меѓу првите што јасно ќе реагираат на какво било нарушување на полскиот суверенитет.
Тој го коментираше и општото ниво на опасност во регионот, велејќи дека вакви инциденти можат да се случат секојдневно, и во Полска и во Унгарија, поради што заканата од војна е реална. Орбан нагласи дека Унгарците засега се држат настрана, додека Полјаците се „до гуша“ вклучени во конфликтот.
Според официјалните информации, во ноќта меѓу 9 и 10 септември, руски дронови 19 пати го нарушиле полскиот воздушен простор. Американскиот претседател Доналд Трамп сугерираше дека можеби станува збор за грешка, додека полскиот премиер Доналд Туск ги отфрли таквите тврдења, нарекувајќи ги манипулација и дезинформација.
