Општина Струга распиша јавен повик за субвенционирање туристичка такса за 2024 година за сите физички лица даватели на услугата за сместување туристи, категоризирани со решение на Општината, соопшти денеска општинската прес-служба.
Право на учество имаат сите физички лица даватели на услуги за сместување туристи, кои се категоризирани на територијата на Општина Струга и уплатиле такса за привремен престој за периодот 1 јануари до 31 декември 2024 година.
„Правото на учество на овој јавен повик се докажува со уплатница/извод од банка за извршената уплата на средства на сметка на Општина Струга. Барањата за враќање на износот на уплатената туристичка такса од сите физички лица даватели на услуги за сместување туристи ќе се разгледуваат поединечно, а ќе се одбијат оние кои нема да ги исполнуваат условите по овој јавен повик. За потврда на веродостојноста на податоците за физичките лица (за уплатената такса) ќе се изврши проверка во секторот за финансиски прашања на Општина Струга“, се наведува во јавниот повик.
Целта, според Општината, е поддршка на угостителските капацитети за сместување туристи, особено на физичките лица, кои даваат услуги за сместување туристи, а ќе им биде вратен 80 отсто од вкупниот износ на уплатените средства.
За аплицирање на повикот, потребно е барање, доказ за платена такса (уплатница/извод од соодветна банка на уплата) и трансакциска сметка за физичките лица.
Потребната документација треба да се достави на шалтер кај општинската администрација најдоцна до 30 јуни 2025 година.
