Охрид Трчат: Маратон на институционални поплочувања (Лекс Охрид Трчатикус)

Ете, драги граѓани, откако со судна мака напредувавме еден сантиметар кон ослободување на државните институции од канџите на “Охрид Трчат”, сега истите тие институции гордо се претворија во новиот Сизиф – со камен на грбот се борат да опстане ова специјално “здружение на искусни тркачи”.

Ни објаснуваат дека од 30 МАЈ до 1 ЈУНИ половина Охрид ќе биде блокиран! Велат: спортска манифестација! Патриотизам! Здравје! А ние наивните си помисливме дека улиците се за сите граѓани, а не за привилегирана група што има волшебни дозволи за блокирање на патишта, раскрсници и булевари.

Колку повеќе блокираш, толку повеќе твоето конто расте – што е сега тоа некаква нова математичка формула? Дали ваква равенка пишува во некој службен весник што ние обичните смртници не сме го прочитале?

- Advertisement -

А институциите? Ох, тие се толку зафатени со давање “амин” на овие блокади што едноставно немаат време да го истражат она што го нарекуваат “криминал”. Секторот за комунални дејности, сообраќај и улици веројатно веќе го подготвува црвениот тепих за следната манифестација на “Охрид Трчат”. Можеби следниот пат ќе им дозволат не само да блокираат улици, туку и да наплаќаат патарина?

И што со судирот на интереси? Ах, тоа е само мит, некаква измислица од стари правни книги! Во Охрид очигледно имаме сопствена верзија на законот – “Лекс Охрид Трчатикус” – каде што судирот на интереси е само една фуснота што никој не ја чита.

Додека обичните граѓани на Охрид мора да бараат дозвола и за да постават саксија пред зградата, господата од “Охрид Трчат” добиваат клучевите од градот на три дена. Прашањето не е колку брзо тие трчаат, туку колку брзо институциите бегаат од својата одговорност!