Обвинителството бара притвор за шестмина дилери на дрога

Основното јавно обвинителство Скопје денеска официјално отвори истрага против шест лица, осомничени за продолжено кривично дело – неовластено производство и пуштање во промет наркотични дроги, психотропни супстанции и прекурсори. По прибирањето на сите неопходни докази во оваа фаза, обвинителството поднесе и предлог за определување мерка ефективен притвор за сите осомничени.

Според информациите од Јавното обвинителство, во периодот од 1 мај до 3 јули 2025 година, шестмината заедно, во повеќе наврати и со умисла, извршувале временски поврзани дејствија на трговија со дрога. Делото го извршувале користејќи ист траен однос и исти или слични услови.

„Тие неовластено продавале или држеле заради продажба наркотична дрога – амфетамин со нето маса од околу 6,5 килограми, марихуана во количина од 257 грама, како и 98 таблети од психотропната супстанца MDMA“, соопшти Јавното обвинителство на Република Северна Македонија (ЈОРСМ).

- Advertisement -

Истрагата траела неколку месеци, при што дел од доказите биле обезбедени преку примена на посебни истражни мерки.

На 3 јули, сите осомничени биле лишени од слобода во координирана полициска акција, по претходно обезбедени наредби од судија за претходна постапка. Претреси биле извршени на повеќе локации во Скопје и Куманово.

„При претресите, покрај веќе наведениот амфетамин, марихуана и MDMA, биле пронајдени и одземени и дополнителни количини од марихуана, хашиш, кокаин, други таблети, повеќе дигитални ваги, предмети и парични средства“, информираа од Обвинителството.

Обвинителот денеска и официјално побара мерка ефективен притвор за сите шестмина осомничени од судијата на претходна постапка при Основниот кривичен суд Скопје.