Основното јавно обвинителство во Кавадарци поднесе обвинение против 43-годишен маж осомничен дека на 27 јули годинава го убил својот помлад брат, воден од користољубие и желба да го задржи имотот за себе.
Трагедијата се случила на роденденот на жртвата, кога меѓу браќата избила расправија. Обвинетиот, бесен и љубоморен дека брат му сака да му го земе целиот имот, го нападнал со тесла. Прво го удрил со металниот дел по главата, а потоа уште двапати, нанесувајќи му смртоносни повреди.
Откако го убил, осомничениот си заминал од местото на злосторството, но следниот ден се вратил и го сокрил телото во бањата. Во наредните денови неколкупати повторно се враќал за да ги избрише трагите — ја чистел крвта и на крај телото го пренел во шупата, каде што го затрупал во ров и го покрил со шперплоча и други предмети.
Во периодот додека никој не го пријавил исчезнувањето, односно меѓу 30 јули и 5 август, обвинетиот неколкупати подигал пари со банкарската картичка на жртвата. Телото било откриено на 5 август.
Обвинителството поднесе обвинителен акт за убиство по член 123 став 2 точка 4 од Кривичниот законик и побара продолжување на притворот за обвинетиот.
