Српскиот министер за земјоделство, шумарство и водостопанство Драган Гламочиќ денеска изрази незадоволство од досегашната работа на Управата за ветеринарство и укажа на пореметувања во производството на свинско месо и потреба од зајакнување на „суверенитетот на храната“.
„Минатата година увезовме повеќе од 500.000 прасиња и повеќе од 50.000 тони месо. Подобро е да се увезуваат прасиња, а потоа да се гојат во Србија, користејќи домашни суровини, капацитети и работна сила“, рече Гламочиќ на работната средба со раководството на Управата за ветеринарство, соопшти Министерството за земјоделство.
Тој го поддржа иницирањето експертска расправа во Управата за разгледување на можноста за увоз на прасиња, пред се од Данска, каде традиционално се врши најголем број на увоз.
Гламочиќ најави дека безбедноста на храната, како и здравјето на луѓето и животните ќе бидат стратешки приоритет на Министерството за земјоделство и побара итен состанок на кризниот штаб за шап и лигавка, заедно со детален извештај за сите досега спроведени мерки.
Иако има активни епидемии на шап и лигавка во Унгарија и Словачка, Гламочиќ нагласи дека одлуките мора да се засноваат на експертска проценка на ризикот, како и на практиките на другите земји во регионот.
„Лесно е да се забрани сè, но економијата мора да функционира. Државата мора да одговори, како што направивме за време на пандемијата на коронавирус“, рече Гламочиќ, кој го замени Александар Мартиновиќ на чело на Министерството за земјоделство.
Според него, Србија не смее да го забрани увозот без јасни основи, бидејќи како значаен извозник на земјоделски производи мора да ги земе предвид можните реципрочни мерки, а наместо тоа, неопходно е да се зајакнат контролите и да се подигне квалитетот на увезената храна, бидејќи тој треба да биде на задоволително ниво.
Новиот министер за земјоделство, шумарство и водостопанство вчера ја критикуваше досегашната работа на Управата за плаќања во земјоделството, нагласувајќи дека ефикасната и транспарентна исплата на субвенциите ќе биде еден од приоритетите на министерството со кое раководи, а почитувањето на роковите и дијалогот се основа на земјоделската политика.
