Новак Ѓоковиќ се пласираше во полуфиналето на Мастерсот во Мајами, откако во четвртфиналето го совлада Американецот Себастијан Корда со 6:3, 7:6. Во следната фаза ќе се соочи со бугарскиот тенисер Григор Димитров, но покрај неговата победа, јавноста беше особено заинтересирана за нешто друго – неговите необични сини ракавици.
За време на натпреварот, камерите го уловија српскиот ас како ги носи ракавиците и ги трие по вратот и лицето. Оваа сцена предизвика бројни прашања меѓу љубителите на тенисот – дали станува збор за нова тајна технологија или пак за некаков психолошки трик на Ѓоковиќ?
Всушност, ракавиците биле полни со мраз, а нивната цел била да го оладат телото за што пократко време. Легендарната тенисерка Мартина Навратилова, која го коментираше мечот за Скај Спортс, остана воодушевена од методот на Новак.
– Го видовме ова пред неколку години – може да ја намали телесната температура за 30 секунди. Го лади крвотокот и дава дополнителна енергија. Не знам зошто повеќе тенисери не го користат ова. Новак секогаш е чекор пред сите кога станува збор за технологијата. Ова е магија и турнирите треба да овозможат вакви алатки за сите играчи – изјави Навратилова.
Овој потег уште еднаш ја покажа посветеноста на Ѓоковиќ кон деталите и неговата способност да користи иновации за подобрување на играта.
