Само неколку дена пред закажаното вонредно Собрание на Кошаркарската федерација на Македонија (КФСМ), сѐ поизвесно е дека нов претседател на КФСМ ќе биде успешниот бизнисмен од Гевгелија, Томица Главчев.
Според информациите до кои дојде порталот Екипа, тој ќе биде единствениот кандидат на Собранието закажано за 30 април.
Главчев, кој во изминатите 20 години е еден од најголемите приватни инвеститори во македонската кошарка, зад себе има импресивно спортско портфолио. Долги години беше главен финансиер на Кожув, краток период и на МЗТ Скопје, а како сопственик на Блокотехна го освои регионалниот БИБЛ шампионат и настапи во финале на македонскиот куп.
Покрај домашната сцена, неговата поддршка беше препознаена и надвор од границите – посебно во моментите кога Партизан Белград минуваше низ тешка финансиска криза, а Главчев важеше за клучен спонзор кој обезбеди стабилност за клубот.
Иако до неодамна се појавуваше како сојузник на Младен Ѓуроски – фаворитот кој важеше за сигурен наследник на Перо Антиќ, Главчев сепак ќе биде тој што ќе ја преземе претседателската функција.
Само пред неколку месеци беше именуван во Управниот одбор на актуелниот претседател, а минатата недела беше промовиран како поддржувач во тимот на Ѓуроски.
Меѓутоа, како што објави Екипа, токму од „највисока инстанца“ било одлучено Главчев да биде прв избор за лидер на мак-баскетот, со цел неговото деловно искуство и финансиска стабилност да бидат впрегнати во стабилизирање на федерацијата.
Што се однесува до Младен Ѓуроски, тој и дел од неговиот тим сепак ќе добијат своја улога во новата структура на КФСМ. Како што дознаваме, тие ќе бидат вклучени во работата на Федерацијата, а конкретните позиции ќе се дефинираат непосредно пред почетокот на Собранието.
Собранието на КФСМ, на кое официјално треба да се изгласа недоверба за Перо Антиќ, ќе се одржи на 30 април.
