Невремето направи хаос во Загреб

Силното невреме што во текот на ноќта и утрото го зафати Загреб предизвика голем хаос низ хрватската престолнина. Ветровите со брзина до 120 километри на час соборија дрвја, однесоа делови од покриви, урнаа семафори и сериозно го нарушија сообраќајот во градот.

Пожарникарите беа преплавени со стотици повици од граѓани. Во многу делови од градот водата навлезе во станбени згради, а штети се регистрирани и на некои од препознатливите објекти. Еден од симболите на градот, кошаркарскиот центар „Дражен Петровиќ“, претрпе значителни оштетувања – силниот ветер го откорна дел од покривот.

Сообраќајот во Загреб е сериозно нарушен. Трамвајскиот и железничкиот сообраќај се прекинати или значително ограничени поради паднати дрвја и гранки на пругите. На некои раскрсници сообраќајот е практично запрен, а полицијата рачно го регулира движењето. Делови од автопатите А1 и А6 се затворени поради силен ветер и зимски услови.

- Advertisement -

Во повисоките делови на Загреб и околината, особено на Сљеме, ситуацијата доби речиси зимски карактер, фати вистинска снежна бура, а некои жители останаа без електрична енергија и греење.