Настинката и грипот имаат слични симптоми, но бидејќи грипот понекогаш може да ескалира во нешто посериозно, препознавањето на клучните разлики може да биде клучно за управување со симптомите.
Нутриционистичката терапевтка и фармацевт Дебора Грејсон откри за Express како можете да ги разликувате.
Таа истакна дека симптомите на настинка често се развиваат постепено во текот на неколку дена и обично се прилично благи, додека грипот обично започнува ненадејно, понекогаш за само неколку часа.
За настинка, секојдневните активности треба да бидат подносливи, додека првите неколку дена од грипот ќе ве разболат толку што нема да можете да вршите нормални активности, пренесува Крстарица.
Друга клучна разлика е што настинката обично вклучува назални симптоми, како што се течење или затнат нос и кивање, додека првиот симптом на настинка е најчесто болно грло, што е помалку веројатно кај грипот. Силната, сува и упорна кашлица е честа појава кај грипот, како и болки во телото и треска.
Додека благо зголемување на температурата е нормално за настинка, грипот може да предизвика треска која може да достигне 38°C или повисока. Заморот е уште еден показател. Додека благиот замор е нормален при настинка, кај грипот е многу поизразен и може да трае со недели, дури и откако ќе исчезнат другите симптоми.
Што се однесува до децата, таа рече: „Симптомите на грип понекогаш вклучуваат стомачни проблеми, вклучувајќи гадење, повраќање или дијареа. Овие симптоми ретко се присутни кај обичната настинка“.
Таа истакна дека најдобриот начин за лекување на вирусот е да се одморите и да пиете многу течности и дека иако лековите против болки можат да ги ублажат симптомите неколку часа, тие нема да влијаат на тоа колку долго траат симптомите.
„Посебно во зимскиот период посетата на фармацевт може да го намали притисокот врз општите лекари и како резултат на тоа да го намали товарот на здравствените установи“, посочи таа.
Ако имате сериозни симптоми, вклучувајќи болка и тешкотии при дишењето, треба да го посетите вашиот лекар или фармацевт, особено ако имате здравствени проблеми како астма, дијабетес или ослабен имунолошки систем, советува Националната здравствена служба на ОК.
