Не сме се помрднале од усогласеноста со ЕУ на сметка на стратешкото партнерство со САД

Македонија гласаше за американскиот текст на резолуцијата за Украина во Обединетите Нации (ОН) врз база на три непоколебливи принципи во својата надворешна политика, а главната порака е дека Македонија смета дека сега е време за мир и за дипломатско решение за војната.

Вака извор од Министерството за надворешни работи и надворешна трговија одговори на прашањето во врска зошто Македонија го поддржа текстот на САД во Обединетите Нации во кој Русија не беше спомената како агресор.

Мaкедонија беше воздржана кога во гласањето беше вметната клаузулата Русија да се спомене како агресор како што бараше алтернативниот текст на резолуцијата поднесена од Украина и поддржана од ЕУ. Изворот објаснува зошто Македонија беше воздржана:

- Advertisement -

– Меѓу повеќето земји имаше принципиелен договор дека доколку се додаде што било во резолуцијата ќе бидеме воздржани.

Изворот објаснува дека Македонија анализирала повеќе време пред да ја донесе одлуката да застане зад американскиот текст, имајќи ги предвид трите принципи од кои се води Македонија коишто се стратешкото партнерство со САД, стратешката определба за членство во ЕУ и заедничката надворешна и безбедносна политика со земјите на ЕУ.

– Шемата на гласањето беше многу јасна, целосна усогласеност со САД. Не можеме да го менуваме стратешкото партнерство само затоа што се смени администрацијата во САД. Но, истовремено, не се помрднавме ниту сантиметар од усогласеноста со ЕУ. Можете да видите дека во специфичниот момент сега и ЕУ бара од САД усогласување на ставовите за Украина – вели изворот објаснувајќи дека динамичните односи меѓу Вашингтон и Брисел не влијаат на усогласеноста на Македонија со двата партнера.

Тој потсетува дека Македонија ќе го следи својот интерес, а тоа е отпочнување преговори со Европската Унија.

– Тој процес не е сопрен – потсетува изворот коментирајќи ги негативните реакции на евроамбасадори во Македонија поради гласањето во ОН.

Ден по гласањето, францускиот претседател Емануел Макрон го посети Вашингтон велејќи дека Франција и САД ќе останат на вистинската страна на историјата.

– Во следниот период клучно ќе биде градењето на заедничкиот став на земјите на ЕУ. Самата ЕУ ги повика и земјите кои не се членки да учествуваат во процесот – брифираат од МНР.

На прашањето дали позицијата на Македонија е дека нема мир без Украина на преговарачката маса, изворот вели:

– Нема земја во светот каде што е тоа дилема во ЕУ ниту пак во САД. Самиот Зeленски најава посета на Саудиска Арабија на 10 март за да работи со американските партнери за мир во Украина.