На собирот што се одржа денеска на пладне пред платото на Универзитетот „Св. Кирил и Методиј“ во Скопје, им се слоши на некои од присутните студенти и беше повикана Брза помош.
Поради тоа неколку пати беа прекинати обраќањата на ректорката Билјана Ангелова и на министерката за образование Весна Јаневска.
– Тука сме сите заедно да искажеме најдлабоко сочувство и почит кон починатите и кон нивните семејства. Ви благодарам за вашето присуство затоа што вашето присуство значи свесност, солидарност, хуманост, споделување не само на доброто, туку и на тагата и на болката. Овде сме сите заедно за да им помогнеме на живите да ја преболат тагата. Ќе цитирам стихови од Ацо Шопов „Ако имаш нешто неискажано, нешто што те притиска и пече, кажи го во длабока тишина, тишината сама ќе го рече“ – рече минисерката и беше прекината од извикувања дека доаѓа Брза помош.
Откако беше кажано дека се повикани неколку возила од Брзата помош, министерката рече:
– Очигледно е дека ова предлого трае. Вашата порака е примена.
Во еден момент насобраната толпа почна да извикува по што претставникот на студентите од говорница мораше да ги смири:
– Ве молам за тишина, ова е мирен собир. Треба да искажеме почит во мир и во тишина. Собирот е за да искажеме почит за жртвите а не за да се протестира. Ве молам да искажеме почит во мир и тишина. И ако треба да помогнеме, да помогнеме сите. И како студенти да покажеме сплотеност во вакви моменти.
Отворена е Книга на жалост пред Правниот факултет, а во поставените кутии може да се донираат пари кои ќе бидат донирани на Црвениот крст.
Собирите на студентите ќе се одржуваат секој ден од 12 часот секој ден до 21 март 2025 година.
