Групата Гренланѓани со шапки „Направи ја Америка повторно голема“; кои присуствувале на ручекот, организиран од Доналд Трамп Јуниор; не биле посветени поддржувачи на новоизбраниот претседател на САД, туку бездомници намамени од можноста за бесплатна храна, се тврди, објави Гардијан.
Трамп Јуниор минатата недела го посети главниот град на Гренланд, Нук, набргу откако неговиот татко изјави дека е „апсолутна неопходност“ САД да ја преземат контролата врз полуавтономната данска територија.
За време на неговата посета, Трамп Јуниор отишол на ручек во хотелот „Ханс Егеде“ со група луѓе со шапки „Мага“ и го ставил својот татко на звучник. Новоизбраниот претседател им рече: „Ќе се однесуваме добро со вас“.
Но, извршниот директор на хотелот, Јорген Беј-Каструп, рекол дека многу од неговите гости не биле поддржувачи на Трамп, туку луѓе кои неговиот тим ги сретнал на улица, кои дури подоцна дознале кој е Трамп Јуниор.
Опишувајќи многумина од групата како бездомници, тој рекол дека Трамп Јуниор штотуку ги сретнал на улица и ги поканил на ручек или неговиот персонал го направил тоа.
– Мислам дека не знаеја кого покануваат. Тоа, се разбира, ни беше малку чудно бидејќи видовме гости кои никогаш претходно не сме ги виделе во нашиот хотел и веројатно никогаш повеќе нема да ги видиме зашто тоа е надвор од нивните економски можности – додал тој.
Групата од околу 15 луѓе јадела традиционален гренландски ручек, вклучувајќи риба и карибу.
– Тие не беа поддржувачи на Трамп. Тие само рекоа: „Еј, некој нѐ покани на ручек, ајде да одиме да му се придружиме. Мислам дека подоцна дознаа кој е – објаснил Беј-Каструп.
Им давале по 100 долари на деца?
Според други сведоци, при посетата на Трамп Јуниор, луѓето облечени во шапки на „Мага“, со американски знамиња, наводно, биле снимани додека делеле банкноти од 100 долари.
Еден маж, Јакоб Нордстром, бил цитиран во гренландскиот весник „Сермисијак“ дека неговиот 11-годишен син дошол дома со банкнота од 100 долари.
– Навистина е шокантно да се дознае дека мојот 11-годишен син добил пари од возрасен човек што не го познава – изјавил тој за весникот, кој ги опиша оние што ги делат парите како канадско-американски влијателни лица.
„Сериозно ли мислите дека ќе талка низ Гренланд за да собира бездомници?“
Портпаролот на Трамп Јуниор ги негираше тврдењата.
Како одговор на барањето на Гардијан за коментар во врска со гостите на ручекот на Трамп Јуниор, политичкиот оперативец и пријател на синот на новоизбраниот претседател, Артур Шварц, рекол дека тие обвинувања немаат смисла.
– Дали мислите дека Доналд Трамп Јуниор талкал низ Гренланд и канел бездомници на ручек, или, пак, сфаќате дека тоа звучи толку надвор од дури малку смешно, што би требало да се чувствувате глупаво дури и да го поставите прашањето? Имаше камери кои го следеа наоколу од секундата кога стигна таму до моментот кога замина. Дали тие не успеаја да го снимаат како регрутира бездомници … на неговиот ручек… за бездомници? – одговорил тој со прашање.
Посетата на Трамп Џуниор се случи кога неговиот татко одби да ја исклучи можноста за користење воена или економска акција за преземање на најголемиот остров во светот.
Републиканците во Претставничкиот дом објавија нацрт-закон, наречен „Да го направиме Гренланд повторно голем“, кој ќе ѝ овозможи на администрацијата на Трамп, која стапува на функција во понеделник, да води разговори за обид за купување на територијата.
Гренланд и Данска постојано потенцираат дека островот, чијашто надворешна и безбедносна политика е под контрола на Данска, членка на НАТО, не е на продажба. Гренландскиот премиер, сепак, рече дека неговата влада е заинтересирана за продлабочување на соработката со САД и дека има отворени врати во однос на рударството.
– Ние не сме трговија, ние не сме нешто за продажба. Би сакале да соработуваме, но не сме на продажба – рекол Беј-Каструп, кој е Данец, запрашан за интересот на Трамп за Гренланд.
