Цунами бранови повисоки од 1 метар го погодија Кресент Сити – крајбрежна заедница на околу 24 километри јужно од границата со Орегон, во текот на ноќта, соопшти Националната метеоролошка служба на САД, објави Си-Ен-Ен.
„Продолжете да ги избегнувате плажите и пристаништата, бидејќи активноста на цунамито ќе продолжи. Во областа на заливот, сега гледаме осцилации на плимата од 60 до 75 сантиметри за само 15 минути. Ова може да предизвика навистина опасни струи долж плажите и пристаништата. Најдобро е денеска да се држите подалеку од водата!“, предупреди канцеларијата на службата во Јурека, Калифорнија, малку пред 3 часот по локално време.
Колумбија нареди евакуација долж своето пацифичко крајбрежје
Колумбија штотуку издаде предупредување за цунами за неколку области на своето пацифичко крајбрежје, вклучувајќи ги департманите Наринјо и Чоко, објави Си-Ен-Ен.
Според Националната единица за управување со ризици од катастрофи на Колумбија, во тие подрачја се воведуваат затворања на плажите и безбедносни мерки за морскиот сообраќај.
„Како превентивна мерка, се препорачува евакуација на плажите и на ниските крајбрежни области во департманите Наринјо и Чоко. Упатете се кон повисоки подрачја, подалеку од брегот“, соопшти агенцијата.
Во меѓувреме, издадено е и предупредување за цунами за департманите Каука и Вале дел Каука.
Намалено е предупредувањето за цунами на Хаваи
Предупредувањето за цунами за Хаваи е намалено, соопшти Пацифичкиот центар за предупредување за цунами.
Тоа значи дека постои можност за силни бранови, помали поплави и за силни струи, но не се очекува големо цунами.
– Евакуираните можат да се вратат дома, соопшти гувернерот на Хаваи – Џош Грин.
На луѓето им се советува да возат полека и внимателно, а истовремено внимаваат на поплави во некои области.
Во меѓувреме, хавајскиот оддел за транспорт соопшти дека се обновени летовите на меѓународниот аеродром Хонолулу. Хавајската агенција за управување со вонредни состојби (ЕМА) најави дека повторно ќе бидат отворени и морските пристаништа.
Намалено е предупредувањето за цунами во Јапонија
Јапонија ги намалила предупредувањата за цунами издадени за широк дел од архипелагот, додека ги оставила непроменети предупредувањата за северните области на земјата, објави Гардијан.
Предупредувањата за источниот јапонски регион Ибараки, па сѐ до јужниот регион Вакајама, сега се намалени на „совети за претпазливост“, објави јапонската метеоролошка агенција на својата веб-страница.
