Западна и централна Словенија беа погодени од разорно невреме, проследено со урагански ветрови, дожд и оштетувања на инфраструктурата. Илјадници домови останаа без електрична енергија, а неколку главни сообраќајници беа целосно блокирани.
Силната бура најпрво удри во областа Бовац и Кобарид, на границата со Италија, по што се прошири кон внатрешноста на Словенија – во Крањ, Камник, па сè до главниот град Љубљана.
Според информациите од дистрибутивните мрежи, над 6.000 корисници останале без струја во регионите на Хорјул, Полхов Градец, Домжале, Литија и Грошупље. Екипите на електродистрибуцијата работат на терен, но се соочуваат со тешкотии поради оштетени мрежи и паднати дрвја.
Во Љубљана, силните ветрови корнеа дрвја и кршеа гранки, при што е оштетена фасадата на неколку станбени објекти, а некои улици беа привремено затворени.
Голем број патишта беа блокирани откако паднати дрвја и гранки ја попречија нормалната циркулација. Автопатите Долењска и Приморска, како и јужната и западна обиколница на Љубљана, беа делумно или целосно затворени. Сообраќајниот информативен центар апелира до возачите да не патуваат без неопходност и да бидат крајно претпазливи.
Невремето сега се движи кон источната покраина Штаерска, но според прогнозите, би можело да ослабне во текот на вечерта.
Метеоролошките служби во регионот издадоа портокалово предупредување за бури, што важи за западна и централна Словенија, југоистокот, како и за делови од Хрватска, каде што исто така се пријавени локални невремиња.
