Научниците открија дека често препишуван антибиотик би можел да помогне во намалувањето на ризикот од развој на шизофренија кај адолесцентите.
Меѓународен тим истражувачи од Универзитетот во Единбург дошол до овој заклучок анализирајќи податоци од голем фински регистар за здравствена заштита.
Тимот ги проучувал податоците за повеќе од 56.000 адолесценти кои разговарале со психолози или психијатри за разни ментални нарушувања и им биле препишани антибиотици од други причини.
Се покажа дека ризикот од развој на шизофренија кај групата третирана со антибиотикот доксициклин бил за 30 до 35 проценти помал отколку кај нивните врсници на кои им биле препишани антибиотици од други групи.
Доксициклинот е антибиотик со широк спектар кој најчесто се користи за лекување на инфекции и акни, а научниците веруваат дека неговите ефекти врз шизофренијата може да бидат поврзани со ефектите на лекот врз воспалението и развојот на мозокот.
Претходните студии сугерираа дека доксициклинот може да го намали воспалението во мозочните клетки и да влијае на синаптичкото кастрење, природен процес во кој мозокот ги рафинира своите невронски врски со отстранување на вишокот компоненти, или синапси, кои се клучни за мозокот брзо и ефикасно да функционира. Синаптогенезата е процес на создавање синапси, местата каде што се одвива комуникацијата помеѓу два неврона.
Накратко, мозокот е како компјутер кој постојано брише непотребни податоци за да направи место за нови – процес што се случува за време на спиењето. Многу важна активност на мозокот е способноста да ги разгради старите невронски врски, што се нарекува синаптичко кастрење.
Сепак, прекумерното кастрење е поврзано со развојот на шизофренија – тешко ментално нарушување кое обично се појавува во раната адолесценција и често е придружено со халуцинации и заблуди.
Тимот го нарече откритието исклучително интересно, истакнувајќи дека тоа укажува на потенцијал за пренамена на постоечки, широко користен лек како превентивна мерка во третманот на оваа сериозна ментална болест.
„До половина од луѓето кои развиваат шизофренија претходно имале контакт со служби за ментално здравје на деца и адолесценти поради други проблеми со менталното здравје“, објасни професорот Иан Келехер, водечки автор на студијата и професор по детска и адолесцентна психијатрија на Универзитетот во Единбург.
Тој додаде дека лекарите „моментално немаат специфични интервенции за кои е познато дека го намалуваат ризикот од развој на шизофренија кај младите луѓе“, но дека откритието е предизвик и поттик за понатамошно истражување.
„Бидејќи ова е опсервациска студија, а не рандомизирано контролирано испитување, не можеме да извлечеме цврсти заклучоци за причината и последицата, но ова откритие дава силна поддршка за понатамошно истражување на заштитните ефекти на доксициклинот и другите антиинфламаторни терапии кај адолесцентни психијатриски пациенти како начин за потенцијално намалување на ризикот од развој на тешка ментална болест во зрелоста“, рече Келехер.
Во студијата учествуваа научници од Универзитетот во Единбург, Универзитетот во Оулу, Универзитетскиот колеџ во Даблин и Групата за болнички услуги „Св. Јован Божји“, а беше финансирана од Советот за здравствени истражувања.
Резултатите од студијата беа објавени во Американскиот журнал за психијатрија.
