Претседателката на Здружението на приватни матични лекари, д-р Лилија Чолакова Дервишова, соопшти дека денеска сите приватни матични лекари ќе штрајкуваат.
Причината за штрајкот кој беше најавено да започне во 11 часот, посочува таа, е одлуката на Управата за електронско здравство „Мој термин“ која без претходна најава наложила задолжителна верификација на мобилните телефони на пациентите пред да им се овозможи лекарски преглед.
Д-р Чолакова Дервишова тврди дека утринава системот „Мој термин“ не дозволувал лекарите да вршат прегледи без претходна потврда на телефонскиот број на пациентот, што довело до проблеми, особено кај оние пациенти со посериозни симптоми, но и кај повозрасните кои не умеат да ракуваат со мобилните телефони или кои воопшто немаат личен мобилен телефон.
– Никој не нѐ предупредил за ова. Непопустливо е да се воведат реформи за кои не сме известени од никого. Многу пациенти не знаат да ракуваат со мобилни телефони. Имаме постари пациенти, понекогаш ни доаѓаат сами деца чиишто мајки работат во фабрика. Ние, место да ги прегледаме, мораме да се занимаваме со нивните мобилни телефони. Нам не ни е тоа работа, нам ни е работа да лекуваме пациенти – изјави д-р Чолакова за Плусинфо.
На прашањето дали оваа нова процедура веќе предизвикала конкретни проблеми со пациенти, Чолакова потврди дека се јавиле компликации со прегледот на некои пациенти.
– Дојде постар пациент којшто не знаеше како да отвори пораки. Па требаше да влегуваме во неговиот телефон, па се јавија проблеми, а ние немаме дополнително време, чекаат пациенти, а некои од нив може да бидат итни случаи – потенцира Чолакова.
Д-р Чолакова посочи дека засега станува збор за пробен период, но дека од 3 март „Мој термин“ планира целосно да ја воведе оваа промена во системот.
