Масовен руски напад врз Харков! Има мртви и ранети, зградите се во пламен

Новите руски напади врз североисточниот украински град Харков во текот на ноќта убија две лица, а повредија повеќе од 50, соопштија украинските власти.

Интензивните напади од 17 беспилотни летала запалија 15 станови во петкатна зграда и предизвикаа штета во други делови од градот, изјави градоначалникот на Харков, Игор Терехов.

„Повеќекатните згради, приватните домови, игралиштата, бизнисите и јавниот превоз беа директно погодени“, објави Терехов на апликацијата за пораки Телеграм. „Становите се во пламен, покривите се уништени, автомобилите се во пламен, прозорците се скршени“, рече тој.

- Advertisement -

Од 54 повредени, девет лица се хоспитализирани, меѓу кои двегодишно девојче и 15-годишно момче, изјави регионалниот гувернер Олех Синехубов на Телеграм. Тој додаде дека биле погодени неколку станбени згради и автобуска станица.

Харков, вториот по големина град во Украина, кој се наоѓа на помалку од 50 километри од руската граница, е цел на разорни ноќни напади од минатата недела.

Во ноќта од петок кон сабота, тој претрпе околу педесет експлозии, што, според украинските власти, беше најмоќниот напад врз тој град од почетокот на војната. Најмалку три лица загинаа, а 17 беа ранети.

Сè уште нема знаци за примирје, а Украина и Русија во вторник ја завршија втората фаза од големата размена на воени заробеници, единствениот конкретен напредок во неодамнешните мировни преговори во Истанбул.

Ниту една страна не објави колку затвореници се разменети.

Москва и Киев неодамна се согласија во Истанбул да разменат најмалку 1.000 затвореници од секоја страна, како и неколку илјади тела на паднати војници, но се појавија компликации при спроведувањето на овој план.