Маск ќе исчезне од политичката сцена

Илон Маск изјави дека планира драстично да ги намали политичките трошоци и потврди дека ќе остане извршен директор на Тесла најмалку уште пет години, откако се појавија сомнежи околу неговото балансирање меѓу улогите во бизнисот и политиката.

Настапувајќи на Економскиот форум во Катар, Маск рече дека повеќе нема да троши пари за политички цели – освен ако не се појави конкретна причина за тоа.

– Ќе правам многу помалку политичко трошење во иднина. Мислам дека доволно направив – изјави Маск во интервју за Блумберг, додавајќи дека во моментов не гледа причина за дополнителни донации.

- Advertisement -

Изјавата доаѓа откако беше откриено дека Маск дал околу 250 милиони долари за кампањата на Доналд Трамп и водел оддел во американската администрација наречен Оддел за владина ефективност (DOGE).

Во обид да ја ублажи загриженоста кај инвеститорите, Маск ја потврди својата посветеност кон Тесла.

– Ќе останам извршен директор на Тесла. Во тоа воопшто нема сомнеж – рече Маск, кој моментално поседува 13% од акциите на компанијата.

Спекулациите за евентуално повлекување на Маск беа подгреани од неодамнешен извештај на „Wall Street Journal“, според кој одборот на Тесла наводно ангажирал агенции за регрутација со цел да најдат потенцијална замена. Но, претседателката на компанијата, Робин Денхолм, јавно го негираше тоа.

Покрај Тесла, Маск раководи со неколку други компании, меѓу кои и СпејсИкс. Тој најави дека неговата сателитска интернет услуга Старлинк, која веќе оперира во над 70 земји, би можела да стане јавна компанија.

– Старлинк бележи брз глобален раст, особено на пазарите во развој како Индија – изјави Маск.