Малдивите станаа првата земја во светот што спроведе генерациска забрана за пушење – забранувајќи пушење, купување и продажба на тутун на сите луѓе родени по 1 јануари 2007 година.
Забраната стапи на сила во саботата на јужноазискиот архипелаг, што Министерството за здравство на Малдивите рече дека „претставува историска пресвртница во напорите на земјата да го заштити јавното здравје и да промовира генерација без тутун“, објави Си-Ен-Ен.
Мерката, соопшти министерството, „ги прави Малдивите првата земја во светот што спроведува национална генерациска забрана за тутун“.
Според Светската здравствена организација (СЗО), пушењето предизвикува повеќе од седум милиони смртни случаи низ целиот свет секоја година. Национално истражување од 2021 година покажа дека повеќе од една четвртина од возрасната популација на Малдиви (на возраст од 15 до 69 години) користи тутун, додека стапката е речиси двојно поголема од онаа кај тинејџерите на возраст од 13 до 15 години.
За споредба, околу 20% од возрасните во Соединетите Американски Држави користеле тутун во 2022 година, додека речиси 12% од возрасните во Обединетото Кралство биле пушачи во 2023 година.
Иако Малдивите се првата земја што вовела таква забрана, слични предлози се разгледани – и речиси усвоени – и во други делови од светот.
Нов Зеланд беше блиску до воведување слична мерка во 2022 година, кога владата донесе закон за забрана на продажба на тутун на лица родени по 1 јануари 2009 година.
Сепак, забраната, која требаше да стапи на сила во 2024 година, никогаш не беше спроведена. Само една година откако беше донесен, законот беше укинат за да се надоместат изгубените приходи од намалувањето на даноците – предизвикувајќи негодување кај експертите за јавно здравје и групите против пушењето.
Слични предлози беа предложени во Велика Британија во последниве години, но не успеаја; нова верзија на законот моментално е во парламентот. Предлогот би забранил тутун за секој роден по 1 јануари 2009 година и би ги заострил прописите за продажба на тутун и производи за вејпинг.
Голем број здравствени лидери во Велика Британија потпишаа отворено писмо минатата недела во кое бараат законот да се донесе и изразуваат фрустрација поради доцнењето. Во шесте месеци откако законот последен пат беше дискутиран во парламентот, повеќе од 120.000 млади возрасни почнале да пушат, според писмото, потпишано од раководителите на големите болници, организациите за борба против ракот и филијалите на Националната здравствена служба (NHS).
Забраната на Малдивите е најновиот чекор во долгогодишните напори на земјата за сузбивање на употребата на тутун и пушењето – вклучително и е-цигарите.
Владата го забрани увозот, поседувањето, употребата, производството и дистрибуцијата на сите видови уреди за вејпинг на Малдивите, без оглед на возраста, до крајот на 2024 година.
Властите сега бараат дополнително намалување на пушењето низ целиот архипелаг, со планови за отворање клиники за откажување од пушење кои ќе нудат лекови и поддршка на луѓето кои сакаат да се откажат од употребата на тутунски производи.
Порано ова лето, претседателот дури предложи и парична награда за жителите на секој остров што целосно ќе го искоренат пушењето.
