Словенечкиот кошаркар и голема НБА-ѕвезда Лука Дончиќ се прости од неговиот досегашен клуб Далас маверикс и навивачите на тимот од Тексас.
„Пред седум години дојдов овде како многу млад човек за да го остварам мојот сон да играм кошарка на највисоко ниво. Секогаш мислев дека цела кариера ќе ја поминам во Далас, навистина сакав да ја донесам шампионска титула. Никогаш не можев да сонувам за љубовта и поддршката што ми беа дадени. Го направивте Северен Тексас дом за еден млад човек од Словенија кој за прв пат беше во посета на САД. Низ добрите и лошите времиња, од повредите до финалето на НБА, вашата поддршка остана непоколеблива. Ви благодарам не само што ја споделивте радоста со мене во нашите најдобри моменти, туку и што ме поддржувавте во тешките моменти кога ми беше најпотребно. Започнува ново поглавје во моето кошаркарско патување. Заминувам од град кој секогаш ќе го сметам за мој втор дом. Далас е посебно место, навивачите на Маверикс се посебни.
Ви благодарам од срце“, се вели во соопштението на Дончиќ.
Кошаркарот кариерата ќе ја продолжи во Лос Анџелес Лејкерс по трејдот кој беше големо изненадување за кошаркарската јавност во целиот свет.
Само еден ден откако размената Лос Анџелес-Далас го потресе кошаркарскиот свет, Лука Дончиќ слета во ЛА каде го пречекаа претставници на тимот.
Дончиќ веднаш по излегувањето од авионот се ракуваше со сите, притоа со рацете го правеше знакот на ЛА и на сите јасно им стави до знаење дека е подготвен за работа.
„Благодарен сум за оваа неверојатна можност. Кошарката ми значи сѐ и не е важно каде ќе го играм овој натпревар, тоа ќе го направам со истото задоволство, страст и цел – да ја освојам титулата“, рече Дончиќ во пораката упатена до сите, особено до навивачите на Лејкерс.
Инаку во оваа размена на играчи Лука Дончиќ, Макси Клебер и Маркиф Морис им се приклучија на Лејкерси, а Далас ги доби Ентони Дејвис, Макс Кристи и пик од првата рунда на драфтот во 2029 година.
Јута, исто така, учествуваше во оваа голема зделка во три насоки.
„Џезерите“, кои помогнаа да се оствари размената го добија Џејлен Худ-Шифин и два избора на драфтот од втората рунда.
Навивачите на Далас не се задоволни од трејдот на Лука Дончиќ и затоа организираа протест пред арената Маверикс.
Од реакциите на социјалните мрежи веднаш стана јасно каков е нивниот став за се, а сега тоа го видовме и во реалноста.
Истиот ден тие застанаа пред „Американ Ерлајнс“ арената и организираа протест против трговијата.
Ги имаше околу 50 до 100 и заедно викаа: „Продадете го тимот“, незадоволни од сѐ што се случи.
