ЛГБТК, палестинските и европските знамиња ќе бидат забранети на Евровизија

На овогодинешниот натпревар за песна на Евровизија ќе бидат забранети не само знамињата во боите на виножитото, кои се симбол на ЛГБТК заедницата, туку и палестинските или „европските“ знамиња, соопшти холандскиот јавен сервис АВРОТРОС, појаснувајќи ја одлуката на Европската радиодифузна унија (ЕБУ) за тоа дека учесниците на фестивалот можат да го носат само знамето на својата земја, објавија холандските медиуми.

Организацијата за правата на ЛГБТК заедницата, COC, ја оцени оваа одлука како целосно апсурдна, пишува „НЛ тајмс“.

Во образложението на одлуката, АВРОТРОС нагласи дека Евросонгот не е политички настан, па иако знамето на боите на виножитото не е политичка порака, како што навеле, ЕБУ сакала да го забрани истакнувањето на тоа знаме, и не само него.

- Advertisement -

Организацијата COC соопшти дека носењето на знамиња во боите на виножитото е израз на идентитетот на ЛГБТК заедницата, како и дека бара од холандскиот јавен радиодифузен сервис да побара од ЕБУ да ги повлече новите правила за истакнување на знамињата, но холандскиот јавен радиодифузен сервис одлучил да не го стори тоа.

ЕБУ вчера исто така објави дека Клод, холандскиот претставник на Евровизија, може да го носи само холандското знаме на сцената, а дека знамето на Конго, каде што живеел до својата деветта година, може да го истакне само во неофицијални простории.